Коронавирусний цар тахлын хурдацтай тархалтын улмаас БНСУ өвчтөнтэй ойрын хавьтал болсон хүмүүст 14 хоног өөрийгөө тусгаарлах дэглэм үйлчилж байгаа юм. Тэгвэл БНСУ-ын эрүүл мэндийн байгууллагууд хамтран ирэх сараас эхлэн вакцины хоёр тунг хоёуланг нь хийлгэсэн иргэд заавал хамрагдах 14 хоногийн тусгаарлалтаас чөлөөлөгдөх боломжтой хэмээн мэдэгдсэн байна.

Тодруулбал, Тавдугаар сарын 5-наас хойш коронавирусээр халдварласан хүнтэй ойр харилцаатай байсан болон эх орондоо эргэн ирсэн иргэд вакциндаа бүрэн хамрагдсан бол өөрийгөө тусгаарлах шаардлагагүй болжээ. 

Тус улсад вакцинд бүрэн хамрагдсан иргэд тусгаарлалтаас чөлөөлөгдөх боломжтой хэдий ч 14 хоногийн хугацаанд ажиглалтад байх бөгөөд энэ үедээ хоёр удаа шинжилгээ өгөх ёстой юм. Одоогоор БНСУ хоёр тунт “Pfizer”, “AstraZeneca” вакциныг хэрэглэж байгаагаас гадна “Johnson & Johnson” вакцинд зөвшөөрөл олгосон бол “Moderna”, “Novavax”-н вакцинуудад хэрэглэх зөвшөөрөл хараахан олгоогүй аж. Түүнчлэн Оросын “Спутник V”, Хятадын “Sinofarm” зэрэг БНСУ-д зөвшөөрөгдөөгүй вакцинаар тариулсан иргэдэд шинэ журам үйлчлэхгүй юм байна.

эх сурвалж: yonhap.com

koreatimes.com