Аугаа Эх орны дайны Ялалтын баярт зориулсан цэргийн ёслолын жагсаалын нэгдсэн бэлтгэл өнөөдөр ОХУ-ын нийслэл Москва хотын Улаан талбайд болж байна.

Бэлтгэл Москвагийн цагаар өглөөний 10.00 цагт хүндэт харуулын жагсаалаар эхэлсэн бөгөөд 12 мянга гаруй цэрэг, 190 гаруй нэгж техник, 76 нисэх онгоц, нисдэг тэрэг оролцох юм байна.  Парадыг ОХУ-ын Зэвсэгт хүчний хуурай замын хүчний ерөнхий командлагч, армийн генерал Олег Салюков удирдаж, Батлан хамгаалахын сайд Сергей Шойгу хүлээж авах аж. 

Ялалтын баярын жагсаал уламжлал ёсоор В.М.Халиловын нэрэмжит Москвагийн цэргийн хөгжмийн сургуулийн бөмбөрчдийн ротын жагсаалаар эхэлнэ. Улаан талбайгаар офицер, түрүүч, цэргүүд, цэргийн анги нэтгэлүүд, сонсогч, курсантууд, Суворов, Нахимовын сургуулийн сурагчид, бүх Оросын "Юнармия" хөдөлгөөний гишүүд, мөн ОХУ-ын Онцгой байдлын яам, Үндэсний гвард, Хилийн цэргийн анги нэгтгэлүүдийн нийтдээ 37 жагсаалын хайрцаг явж өнгөрнө. Энэ жил Цэргийн төв тойргийн цэргийн цагдаагийн алба хаагчдын нэгдсэн парадын баг Улаан талбай дээгүүр анх удаа алхахаар болжээ.