Афганистаны нийслэл Кабул хотод байрлах нэгэн охидын дунд сургуулийн ойролцоо дэлбэрэлт болсны улмаас 85 хүн амь үрэгдэж, 100 гаруй хүн шархаджээ.

Тус дэлбэрэлт нь бямба гарагийн үдээс хойш 16:30 цаг орчимд Дашт-и-Барчи орчмын Сайед-ул-Шухада сургуулийн ойролцоо охидыг хичээлээсээ тарж байх үед болсон бөгөөд нас барсан хүмүүсийн ихэнх нь 11-15 насны охид байжээ.

Энэ талаар тус сургуулийн багш Ибрахим "Эхлээд автомашинд бөмбөг дэлбэрсэн хэрэг гарч, дараа нь Кабул дахь охидын сургуулийн ойролцоо дахин хоёр дэлбэрэлт болсон" хэмээн хэвлэл мэдээллийн хэрэгслүүдэд мэдээлжээ.

Афганистаны засгийн газар террорист халдлагыг мөрдөн шалгаж эхэлсэн бөгөөд одоогоор Талибан хөдөлгөөний зүгээс тус халдлагыг үйлдээгүй гэдгээ албан ёсоор мэдэгдсэн байна.

CNN агентлагийн мэдээлж байгаагаар АНУ болон түүний холбоотнууд 20 жил үргэлжилсэн дайнаа дуусгахаар болж, цэргээ Афганистанаас гаргаж эхэлснээр тус улсад зэвсэгт халдлага гарах нь эрс нэмэгдсэн гэжээ. АНУ-ын 2,500-3,500 oрчим цэргийн эхний хэсэг тавдугаар сарын 1-нээс эхлэн Афганистанаас гарч байгаа бөгөөд энэ оны есдүгээр сарын 11-нд дуусах юм.

Эх сурвалж: CNN