Израиль улсын Эрүүл мэндийн сайд Юлий Эдельштейн коронавирусний халдварын шинэ тохиолдлын тоо мэдэгдэхүйц хэмжээгээр буурсантай холбогдуулан халдварын тархалтыг хяналтад авахын тулд тогтоосон хязгаарлалтуудыг цуцлах гэж байгаагаа мэдээлжээ.

Тус улсын хүн амын дийлэнх хувь нь коронавирусний эсрэг вакцинд хамрагдаж, 50-иас дээш насны иргэдийн 92 орчим хувь нь вакцин хийлгэсэн юм уу халдвар аваад эдгэрсэн учраас тус шийдвэрийг гаргахад нөлөөлсөн байна. 

Ю.Эдельштейн үргэлжлүүлэн "Ирэх зургаадугаар сараас хязгаарлалтын арга хэмжээнүүдийг сунгахгүй бөгөөд ногоон паспортын системийг хүчингүй болгоно. Гэхдээ нөхцөл байдлаас шалтгаалан шаадлагатай тохиолдолд дахин хязгаарлалт тогтоож магадгүй" хэмээн анхааруулжээ. Одоогоор тус улсад халдвар тархах эрсдэлтэй үйл ажиллагаа болон хүмүүсийн цуглах тоо зэрэгт хязгаарлалт тогтоогоод байгаагаас гадна иргэд вакцин хийлгэсэн эсэх эсвэл халдвараас эдгэрснээ нотлох “ногоон паспорт”-ыг ашиглаж байгаа юм.

Израильд энэ оны нэгдүгээр сард коронавирусний халдварын тохиолдлын тоо дээд цэгтээ хүрч өдөртөө 10 мянга гаруй хүнээс халдвар илэрч байсан ч тохиолдлын тоо багассаар сүүлийн 24 цагийн хугацаанд 12 тохиолдол шинээр бүртгэгджээ.