Энэ оны хоёрдугаар сард цэргийн эргэлт гарсан Мьянмар улсын байдал өнөөдрийг хүртэл тогтворжихгүй хэвээр байна. Цэргийн засаглалыг эсэргүүцсэн олон улс даяар жагсаал цуглаан хийж, үүний хариуд цэргүүд иргэд рүү буудан, цус асгарсан аймшигт нөхцөл байдал үүсээд байсан билээ. Үүсээд байгаа нөхцөл байдлыг шийдвэрлэхийн тулд олон улс уриалга гаргаж, төрөл бүрийн шийдлийг танилцуулж байлаа.

Улмаар дөрөвдүгээр сарын 24-ний өдөр Зүүн Өмнөд Азийн орнуудын тэргүүнүүд Мьянмар улс дахь хямралыг зогсоох төлөвлөгөөний талаар тус улсын цэргийн эрх баригчдын тэргүүнтэй тохиролцон хүчирхийллийг зогсоож, талуудын хооронд цогц хэлэлцээ хийх, хэлэлцээнд дэмжлэг үзүүлэх АСЕАН-ын тусгай элчийг томилох, тусламж хүлээн авах, элчийг Мьянмар руу нэвтрүүлэх гэсэн таван заалтаар тохиролцоонд хүрч байсан юм.

Хэдийгээр тус тохиролцоонд хүрээд сар орчмын хугацаа өнгөрсөн ч Мьянмарт байдал тогтворжихгүй байсаар иргэний дайн үүсэхэд бэлэн болоод байна. Учир нь энэ долоо хоногт армийнхан умард нутгийн Шан болон Качин мужуудад босогчидтой ширүүн тулаанд оржээ. Учир нь эртнээс тус мужуудад үйл ажиллагаа явуулж буй зэвсэгт бүлэглэлүүд ардчиллыг дэмжигчидтэй нэгдэж, хурдны замуудыг отож, армид шатахуун, нэмэлт хүч тээвэрлэн нийлүүлж буй машинуудыг замд нь тонож, устгаж байгаагаас болоод армийн шатахууны хомсдол улам даамжирсан байна.

НҮБ-ын мэдээлж байгаагаар гуравдугаар сарын дунд үед мөргөлдөөн эхэлснээс хойш Качин мужид 10 мянга орчим хүн гэр орноо орхин дүрвэцгээсэн бөгөөд энэ байдал улсын зүүн болон умард бүсийн хэд хэдэн мужид давтагдаж байгаа аж.

Сүүлийн үед Миндат тосгоны 8000 орчим иргэн тулалдаанаас зугтаж, ихэнх нь ойролцоох ширэнгэн ойд бүгсэн бөгөөд ширэнгэн ойд нуугдсан хүмүүст хүнс, эмийн хомстол гол асуудал болж байна. Мөн эх сурвалжуудын мэдээлж байгаагаар армийг эсэргүүцэгч зэвсэгт бүлэглэлүүдийн нийт гишүүд өдгөө цэргүүдээс олон болсон бөгөөд олон тусдаа удирдлагатай учир армитай олон фронтод зэрэг тулалдах чадвартай болж байгаа гэнэ. 

1948 онд Их Британийн колоничлолоос чөлөөлөгдсөн тус улсад олон соёл, үндэстэн, угсаатан, хэлтэн холилдон амьдардаг бөгөөд нийт нутгийн гуравны нэг хэсгийг 20 өөр зэвсэгт бүлэглэл удирддаг бөгөөд зарим нь олон жилийн өмнөөс армитай тулалдсаар иржээ. Харин сүүлийн үед болж буй үйл явдал, үймээн самуунаас болж тулаан улам ширүүсч байна.

 эх сурвалж: BBC, theguardians.com