Дэлхий нийтийг айдаст автуулаад байгаа коронавирусний халдвар Хятадын лабораториос тархсан байж болзошгүй гэх нотолгоонуудыг дэвшүүлсэн мэдээлэл олон улсын хэвлэл мэдээллийн хэрэгслүдээр гарах болсон.

Үүнтэй холбогдуулан АНУ-ын Ерөнхийлөгч Ж.Байден тагнуулын байгууллагууддаа “COVID-19” - ийн гарал үүслийг судлах хүчин чармайлтаа хоёр дахин нэмэгдүүлж, 90 хоногийн дотор өөрт тайлагнахыг үүрэг болгожээ.

Үүнтэй холбогдуулан АНУ-д суугаа Хятадын Элчин сайдын яамнаас гарал үүслийн ул мөрийг улс төржүүлэхээс сэрэмжлэн "Шинжлэх ухааны асуудал болох гарал үүслийн ул мөрийг улс төржүүлэх нь вирусийн гарал үүслийг олоход бэрхшээл учруулахаас гадна цар тахлын эсрэг олон улсын хамтын ажиллагаанд ноцтой саад тотгор учруулах болно" хэмээн байр сууриа илэрхийллээ хэмээн BBC агентлаг мэдээлсэн байна. 

“COVID-19” халдварын анхны тохиолдол БНХАУ-ын Ухань хотод 2019 оны сүүлээр бүртгэгдсэн бөгөөд түүнээс хойш дэлхий даяар 168 сая гаруй тохиолдол батлагдаж, 3,5 сая хүн амь насаа алдсан гэсэн тоон мэдээлэл гарчээ.

Улмаар дэлхийн эрүүл мэндийн байгууллагууд “COVID-19”-ийн эхний тохиолдлуудыг Ухань хотын далайн бүтээгдэхүүний захтай холбож, судлаачид вирусийг анх амьтнаас хүнд дамжсан хэмээн үзэж байгаа юм.

Эх сурвалж: BBC