Франц улсын Ерөнхийлөгч Эммануэл Макрон орон нутагт иргэдтэй уулзах үеэрээ нэгэн экстремист этгээдэд алгадуулжээ. 

CNN агентлагийн мэдээлж байгаагаар Э.Макрон Францын зүүн өмнөд бүсийн Тайн Лэрмитаж тосгонд рестораны бизнес эрхлэгчид, оюутнуудтай цар тахлын дараах эдийн засгийн сэргэлтийн талаар уулзаад гарч явахдаа тэнд байсан иргэдтэй мэндчилсэн байна. Иргэдийн дунд байсан амны хаалт, нүдний шил зүүсэн нэг эрэгтэй гэнэт Макроны хацрыг алгадсан бөгөөд тухайн этгээд “Montjoie Saint Denis” гэх хаант засаглалыг дэмжигчдийн уриаг хашхирчээ. Дараа нь тэр “Макронизм сөнөтүгэй” гэж хашхирсан байна.

Орон нутгийн цагдаагийн газраас мэдээлж байгаагаар Ерөнхийлөгчийн биед халдсан этгээдийг болон тус хэрэгтэй холбогдуулан өөр хоёр хүнийг баривчилжээ. 

Э.Макрон энэ талаар хэвлэлийнхэнд ярихдаа “Бид цаашдаа ийм явдал гарахаас сэргийлэх хэрэгтэй. Энэ бол онцгой тохиолдол байлаа. Олон нийтийн хэлэлцүүлэгт хүчирхийллийг дэмжигч хүмүүсийг оролцуулахгүй байх хэрэгтэй. Тэдэнд ингэх эрх байхгүй” гэжээ. Түүний энэ үгийг Францын улс төрчид дэмжиж байгаагаа илэрхийлэхээс гадна Макроныг шүүмжлэгчид ч дуу нэгтэйгээр дэмжиж байгаагаа илэрхийлсэн байна. 

эх сурвалж: CNN