Энэтхэгт насанд хүрсэн хүн амыг коронавирусний вакцинд үнэ төлбөргүй хамруулах хөтөлбөрийг хэрэгжүүлж эхэлжээ. 

ТУс хөтөлбөрийн хүрээнд Энэтхэгийн Засгийн газар дотооддоо үйлдвэрлэж байгаа вакцины 75 хувийг худалдан авч, мужуудад тараахаар болсон байна. Мөн бБүс нутгуудын хүлээж авах вакцины тун хүн амын тоо, “COVID-19”-ийн халдварын тохиолдлын тоо, коронавирусний вакцин хийлгэсэн хүмүүсийн тооноос хамаарч өөр өөр байх аж. Харин үлдсэн 25 хувийг мужууд болон хувийн эмнэлгүүд худалдаж авах боломжийг нээлттэй үлдээжээ.

Энэтхэгийн Ерөнхий сайд Нарендра Моди зургаадугаар сарын эхээр дээрх хөтөлбөрийг зарласан бөгөөд улмаар ард түмэндээ хандан үг хэлэхдээ иргэн бүрийг хөрөнгө чинээ, нийгмийн гарлаас нь үл хамааран коронавирусний вакцинд үнэ төлбөргүй хамруулна гэдгийг цохон тэмдэглэсэн юм.

Хэдийгээр Энэтхэг вакцин үйлдвэрлэгч дэлхийн томоохон улс боловч коронавирусний вакцинжуулалтын хөтөлбөр нь удаашралтай хэрэгжиж байгаа орнуудын нэг юм. Тодруулбал, вакцинжуулалтын аяны 156 хоногт нийт хүн амынх нь 20 орчим хувь буюу 28 сая хүн “COVID-19”-ийн вакцины нэг тунг тариулсан бол 51 сая гаруй иргэн буюу нийт хүн амын 3.7 орчим хувь нь вакцины хоёр тунг бүрэн хийлгэжээ.

Одоогийн байдлаар тус улсад 29.9 сая хүн коронавирусний халдвараар өвчилсөн бөгөөд тэдгээрээс 388 мянган хүн нас баржээ.