Карибын тэнгисийн нутагт орших Гаити Улсад өнгөрсөн бямба гарагт 7.2 магнитудын хүчтэй газар хөдөлж, 1297 хүний амь эрсэдэж, 5700 гаруй хүн бэртэж гэмтсэн талаар тус улсын эрх баригчид мэдээлжээ. Одоогоор нийт бэртсэн хүмүүсээс 3200 гаруйг нь эмнэлэгт хүргэсэн бөгөөд хөрш зэргэлдээх улсууд тусламж явуулж, аврагчид нурангид дарагдсан хүмүүсийг гарган авахаар ажиллаж байгаа талаар cnn агентлаг мэдээлсэн байна.  

Мөн тус улсад нэг сарын хугацаанд онц байдал зарласан бөгөөд НҮБ-аас Гаитигийн Засгийн газарт дэмжлэг үзүүлж байгаагаа мэдэгджээ. Урьдчилсан байдлаар, газар хөдлөлтийн улмаас 860 гаруй байшин барилга нурж, 700 гаруй барилга сүйдсэн байна. Үүнээс гадна “Грейс” далайн шуурга Гаитиг даваа гаргийн орой юм уу мягмар гаргийн өглөө дайран өнгөрч, хүчтэй аадар бороо орох төлөвтэй байгаа тул байгалийн гамшгаас үүдэлтэй хохирол ирэх долоо хоног гэхэд улам нэмэгдэж болзошгүй байгаа талаар хэвлэл мэдээллийн хэрэгслүүдээр мэдээлж эхэлжээ. 

Сануулахад, Гаитид 11 жилийн өмнө буюу 2010 онд 7 магнитудын хүчтэй газар хөдлөлт болж, зарим эх сурвалжийн мэдээллээр 100 мянгаас 160 мянган хүн амиа алдаж байжээ. Харин тус улсын Засгийн газар 220 мянганаас 316 мянган хүн амиа алдсан гэж үздэг бөгөөд энэ тоо өнөөг хүртэл тодорхойгүй хэвээр байгаа аж.

эх сурвалж: BBC.com CNN.com