АНУ-ын зүүн хойд хэсгийн гурван муж улсын эрх баригчид лхагва гарагт онцгой байдал тогтоожээ. 

Тодруулбал, Карибын тэнгист үүссэн хар салхи ням гарагт АНУ-ын өмнөд эргийн Луизиана муж улсыг дайрч, дараа нь зүүн хойд эргийг чиглэжээ. Хэдийгээр хар салхины эрч бага зэрэг суларсан боловч хүчтэй аадар бороо, аянга цахилгаан дагуулж Нью-Йорк хотод хэдхэн цагийн дотор 15-25 см хур тунадас орсон байна.

Байгалийн гамшигт Бруклин, Квинс дүүргүүд хамгийн их өртөж, гудамж талбай, байшин барилга, метроны буудлууд үерт автжээ. Үүгээр зогсохгүй хүчтэй аадар борооны улмаас хотын гурван нисэх онгоцны буудлын үйл ажиллагааг түр зогсооход хүрсэн байна. 

Үүнтэй холбогдуулан АНУ-ын Ерөнхийлөгч Ж.Байден пүрэв гарагт ард түмэндээ хандаж үг хэлэхдээ, “Айда” хар салхи, үер, ойн түймэр зэрэг эдгээр бүх гамшиг уур амьсгалын өөрчлөлтөөс үүдэлтэй. Тиймээс бид цаашдаа ийм хэмжээний байгалийн гамшигт бэлтгэлтэй байх шаардлага тулгарч байна" хэмээн онцолжээ.

Одоогийн байдлаар, АНУ-ын зүүн хойд хэсгийг дайрсан “Айда" хар салхины улмаас  45 хүн амь насаа алдсан бөгөөд Нью-Жерси, Нью-Йорк муж улсуудад хамгийн олон хүн амиа алджээ. 

эх сурвалж: BBC.com, aljazeera.com