АНУ-ын цэргүүд мягмар гарагт шилжих шөнө Афганистаныг бүрмөсөн орхиж, 20 жил үргэлжилсэн үйл ажиллагаагаа дуусгавар болгосон. Ингэхдээ үлдсэн цэргээ татаж, 120 мянга гаруй энгийн иргэдийг нүүлгэн шилжүүллээ. Улмаар АНУ-ын цэргийн хүчнийхэн Афганистаныг орхин гарахдаа 73 онгоц, 100 орчим машин, бусад техник хэрэгслүүдээ Хамид Карзайн нэрэмжит олон улсын онгоцны буудалд үлдээсэн.

Гэвч техникүүдийн гол эд ангиудыг салгаж авсан эсвэл устгасан бөгөөд устгахдаа цельсийн 4000 градуст хайлуулдаг гранат ашигласан гэж тус улсын Төв командлалын дарга, генерал Кеннет Маккензи мэдэгдсэн юм.

Гэхдээ талибууд эвдрээгүй үлдсэнийг нь цуглуулж, заримыг нь засч цөөнгүй тооны хуягт машин, нисдэг тэрэг ажиллуулан ялалтын сүрт жагсаал зохион байгуулжээ.

Хиймэл дагуулаас авсан зургуудаас харахад Афганистаны засгийн газар нуран унахаас өмнө зарим онгоцыг тус улсаас Узбекистан руу нисгэсэн байх боломжтой. Мэргэжилтнүүдийн үзэж буйгаар зарим нисэх онгоцууд бэлтгэгдсэн нисгэгчгүй, сэлбэг хэрэгслийн хүрэлцээгүй учраас Талибануудад төдийлөн сайн ашиглагдахгүй байж магадгүй юм. Гэхдээ тодорхой нэгдсэн тоо тогтоох боломжгүй ч 167 нисэх онгоцны ихэнх нь Талибаны мэдэлд байгаа гэж үзэж байна.

Эргэн сануулахад, энэ оны тавдугаар сараас АНУ-ын цэргүүд Афганистанаас гарч, наймдугаар сарын 31 гэхэд сүүлчийн цэргийг нүүлгэн шилжүүлснээр АНУ-ын Афганистанд явуулсан 20 жилийн дайн дуусгавар болсон юм. 

Эх сурвалж: BBC news

Бэлтгэсэн: Б.Цэндмаа