Тайландын орон нутгийн цагдаагийн дарга сэжигтэнд зүй бусаар хандаж улмаар аминд нь хүрсэн хэргийн бичлэг олон нийтэд хүрч багагүй шүүмлэл дагуулсан талаар олон улсын хэвлэлүүд мэдээлсэн.  

Тодруулбал, Цагдаагийн дарга асан, хурандаа Титисант Утханафон метамфетамин төрлийн мансууруулах эм зарж байгаад баригдсан 24 настай залууг байцаах явцдаа хүч хэрэглэн амьсгалыг боогдуулж, цагдан хорих газарт эрүүдэн шүүж буй бичлэг өнгөрсөн сард ил болсон. Тус билэг харгис эрүү шүүлт явуулж байгааг илчлээд зогсохгүй цагдаагийн даргын үйлдсэн бусад гэмт хэргийг ил болгосон нь Тайландын иргэдийг цочирдуулсаан байна.

Хэдийгээр Титисант Утханафон сэжигтэнтэй зүй бусаар харьцсанаа хүлээн зөвшөөрсөн боловч түүнээс авлига нэхээгүй гэдгээ мэдүүлсэн аж.

Гэвч түүний хэргийг мөрдөж байгаа цагдаа нар Титисант Утханафоны Бангкок дахь тансаг байшинг шалгахад өндөр үнэ бүхий олон тооны машиныг олсон байна. Өдгөө 39 настай, сард ердөө 43,000 бат буюу 1000 гаруйхан ам.долларын цалинтай цагдаа хэрхэн Тайландын ханшаар 47 сая бат (1.45 сая ам.доллар) үнэтэй, ердөө зуун ширхгийг л үйлдвэрлэсэн ховор төрлийн “Lamborghini Aventador Anniversario” зэрэг 42 машинтай болсон нь олны анхаарлыг ихээр татаж байгаа юм. 

Тайландад мансууруулах бодис худалдаалах гэмт хэрэг ихэссэн нь цагдаагийн албаныхан хөрөнгөжих эх үүсвэр болсон талаар BBC агентлаг мэдээлсэн бөгөөд тэд Тайландад тушаал ахих хүсэлтэй алба хаагч нар дээд албан тушаалтандаа хахууль өгдөг нь эрх мэдэлтнүүдэд илүү их орлого олох завшаан болдог талаар мөн нийтэлжээ.

Эх сурвалж: BBC