ДЭМБ болон Европын яаралтай тусламжийн агентлагаас ОХУ-ын Спутник V вакциныг түдгэлзүүллээ. Учир нь  ОХУ коронавирусний эсрэг гаргаж авсан вакцинаа олон улсад хүлээн зөвшөөрүүлэхээр ДЭМБ-д удаа дараа хүсэлт тавьж байсан юм. Харин ДЭМБ-аас Спутник V вакциныг хүлээн зөвшөөрөхийн тулд Оросын дор хаяж нэг вакцины үйлдвэрийн үйл ажиллагааг нарийн шалгах шаардлагатай байгаагаа илэрхийлсэн байна.

Улмаар ДЭМБ-аас явуулсан шалгалтад тэд унасан бөгөөд ДЭМБ-ын АНУ дахь салбар эрүүл мэндийн байгууллагын туслах захирал Жарбас Барбоса өнгөрөгч тавдугаар сард ОХУ-ын үйлдвэрүүдийг шалгаад хэд хэдэн зөрчил илрүүлсэн учраас вакциныг хүлээн зөвшөөрөх асуудлыг түр хойшлуулсан гэжээ.

Түүнчлэн тэрээр “Спутник V вакциныг яаралтай тусламжийн журмаар ашиглахыг зөвшөөрөх тухай асуудлыг түдгэлзүүллээ. Учир нь ОХУ-ын вакцины үйлдвэрүүдийн нэгийг шалгаж үзэхэд шаардлага хангаагүй, асуудлууд илэрсэн. Тиймээс Орос орон ДЭМБ-ын зөвлөгөөг дагаж, шаардлагатай өөрчлөлтүүдийг хийн, дараагийн шалгалтанд бэлдэх шаардлагатай. Бид бэлэн болсон талаар мэдэгдэл ирэхийг хүлээх болно” хэмээн онцолсон байна. 

Эх сурвалж: themoscowtimes.com