Өнгөрөгч лхагва гарагт SpaceX компанийн хөлөг дөрвөн энгийн иргэний бүрэлдэхүүнтэйгээр сансарт ниссэн. Тэд сансарт гурав хоногийн хугацаатай аяласан бөгөөд Флоридагийн эргээс холгүй Атлантын далайд амжилттай газарджээ. Энэ бол сансрын түүхэнд анх удаа дан энгийн хүмүүсээс бүрдсэн багийг дэлхийн тойрог замд хүргэсэн тохиолдол хэмээн reuters агентлаг мэдээлсэн байна.  

SpaceX-ийн Crew Dragon хөлгийн капсул дэлхийн агаар мандалд орж ирснийхээ дараа нийт дөрвөн шүхэр задалж, уналтын хурдаа бууруулсаар далайн мандалд буужээ.

Сансрын жуулчдын хамгийн залуу гишүүн байолох АНУ-ын Теннеси муж дахь Сэнт Жюдийн Хүүхдийн эмнэлгийн эмч Хэйли Арсено 29 настайдаа дэлхийн хамгийн залуу сансрын нисгэгч болжээ. Тэрээр мөн анхны хиймэл эрхтэнтэй (протез) сансрын нисгэгч болсон байна. Учир нь Арсено хүүхэд байхдаа ясны хорт хавдрын улмаас нэг хөлөө тайруулж байжээ. 

Дашрамд дурдахад, Inspiration4 багийн гишүүн Айзакмэн, Проктор нар нисгэгчийн лицензтэй боловч тэдний хөлгийн бүх жолоодлогыг SpaceX компани газраас удирдаж, хөлөг дотрох зарим үйлдлийг зааж өгч чиглүүлж байжээ.

Гэхдээ онцгой тохиолдолд бэлтгэлтэй байхын тулд багийн гишүүдийг NASA-гийн сансрын нисгэгчидтэй ижил түвшний сургалтад хамруулсан юм байна.

Эх сурвалж: Reuters