Өчигдөр дэлхий нийтээрээ Хэллоуин буюу сүнсний баярыг тэмдэглэж өнгөрүүлсэн. Энэ өдөр хүмүүс аймшгийн киноны дүрүүдэд хувирч, хүүхдүүдэд амттан тараадаг уламжлалтай.

Гэтэл энэхүү баярын өдрийг цуст өдөр болгосон хэд хэдэн хэрэг АНУ болон Японд бүртгэгджээ. Тодруулбал, Японы нийслэл Токио хотод нэгэн этгээд  метронд хүйтэн зэвсэгтэй дайрч, түймэр тавьсны улмаас 17 хүн шархадсан байна. Тус хэргийг 24 настай этгээд үйлдсэн бөгөөд тэрээр үл мэдэгдэх тунгалаг шингэн цацаж, гал тавьснаар метроны бүхээг утаанд автжээ. 

Цахим орчинд цацагдсан дээрх үйл явдлын бичлэгээс харахад айж цочирдсон зорчигчид метроны цонхоор үсрэн гарч байсан аж. Харин гэмт этгээд баривчлагдах үеэрээ "Би хүмүүсийг алахыг хүссэн, тиймээс цаазын ял авах байх" гэж ярьсан байна.

Халдлагын улмаас гурван хүн хүнд бэртсэн бөгөөд нэг настай хүн ухаангүй байгаа талаар Токиогийн гал сөнөөх газраас мэдээлжээ.

Мөн АНУ-ын хэд хэдэн мужуудад зохион байгуулагдсан Хэллоуиний үдэшлэгийн үеэр буудалцаан болжээ. Тодруулбал, Калифорни мужийн Сакраментод байрлах Roayl Castle-ийн үдэшлэгийн танхимд Хэллоуинд зориулсан эротик үдэшлэг зохион байгуулагдах үеэр гэмт этгээдүүд гал нээсэн байна. Энэ хэргийн улмаас хоёр хүн газар дээрээ амиа алдаж, таван хүн шархаджээ.  

Одоогоор байгаагаар гэмт этгээдүүдийг чухам ямар шалтгааны улмаас дээрх хэргийг үйлдсэн нь тодорхойгүй бөгөөд хэргийг үргэлжлүүлэн шалгаж байна хэмээн цагдаагийн газраас мэдээлсэн байна.

Мөн Чикаго хотоос баруун өмнө зүгт 45 милийн зайд орших Иллинойс мужийн Жолиет хотод мөн буудалцаан болж, хоёр хүн амиа алджээ. Одоогоор 10 гаруй хүн шархадсанаас хоёр хүний биеийн байдал хүнд байгаа талаар эрх баригчид мэдэгдсэн байна. Албаныхны мэдээлж байгаагаар гэмт этгээд хохирогчдыг үдэшлэг болсон байшингийн өндөрлөг хэсгээс харж байгаад гал нээсэн Байх магадлал өндөр байгаа аж. 

Техас муж улсын Тексаркана хотод мөн л Хэллоуиний үдэшлэгт буудалцаан болж, нэг хүн амиа алдаж, есөн хүн шархаджээ. Тексаркана хотын цагдаагийн газраас амь хохирогчийн талаар ар гэрийнхэнд нь мэдэгдэх хүртэл мэдээлэл өгөх боломжгүй бөгөөд үлдсэн есөн хүний бэртэл амь насанд аюулгүй байгаа аж.

Харин гэмт этгээд олны үймээнийг ашиглан зугтсан байх магадлалтай бөгөөд түүнийг шуурхай эрэн сурвалжлах ажлыг эхлүүлжээ. 

эх сурвалж: cbs, bbc, thejapannews