БНСУ-д төрөлт буурч, нас баралт нэмэгдэж, хүн ам нь хөгширч эхэлж буйд тус улсын эрх баригчид санаа зовниж буй. Тиймээс ч хүн амынхаа өсөлтийг дэмжихэд ихээхэн анхаарч ажилладаг. Оны өмнөхөн танилцуулсан таван жилийн бодлогодоо тус улсын Засгийн газар 2022 оноос эхлэн нэг хүртэлх насны хүүхэд бүрт сард 300 мянган воны тэтгэмж олгох шийдвэр гаргасан юм. Энэ тэтгэмж 2025 он гэхэд 500 мянган вон болж өсөх аж. 

Мөн Чанвон хот төрөлтийг дэмжих бодлого хэрэгжүүлж эхэлжээ. Тус хотод техник, хими, хүнд аж үйлдвэр, цахилгаан бараа, автомашин гэх мэт аж үйлдвэрлэл нэлээд хөгжсөн. Гэсэн хэдий ч оршин суугчид нь шилжиж, төрөлт багассан учраас шинээр гэр бүл болж буй хосуудад 100 сая воныг зээлүүлэхээр болжээ. Хэрвээ шинэ гэр бүл нь нэг хүүхэдтэй болвол зээлийн хүүгээс чөлөөлөх аж. Харин хоёр хүүхэдтэй болвол зээлийн нийт төлбөрөөс 30, гурван хүүхэдтэй болвол 100 сая воны зээлээс 100 хувь чөлөөлөхөөр болжээ.

Тус улсын хувьд 2019 онд нэг эмэгтэйд ноогдох төрөлтийн тоо 0.92 болсон нь түүхэн доод үзүүлэлт болжээ. Ийнхүү төрөлт буурсан шалтгаан нь эмэгтэйчүүдийн ажил эрхлэлт нэмэгдсэнтэй холбоотой гэж судлаачид үзэж байна.