1949 оноос хойш БНХАУ-ын төрийн эрхийг 73 жилийн турш барьж байгаа Хятадын Коммунист Намын 20 дугаар Их хурал ням гарагт Бээжин хотын Ардын их хурлын танхимд эхэллээ.

Сүүлийн 10 жил БНХАУ-ыг удирдаж байгаа Ши Жиньпин 2018 онд үндсэн хуульдаа өөрчлөлт оруулж дээд тал нь хоёр бүрэн эрхийн хугацаанд ажиллах хязгаарыг цуцалсан юм. Ингэснээр тэрээр гурав дахь бүрэн эрхийнхээ хугацаанд, цаашлаад насаараа Хятадыг удирдах боломжтой болж байгаа юм.

Өчигдөр тэрээр Их хурлыг нээж хэлсэн үгэндээ хоёр цагийн илтгэл тавьж, цаашид хэрэгжүүлэх бодлогоо танилцууллаа.

Хүн амынхаа 30 хувийг ковидын хатуу хөл хорионд байлгаж байгаа “Тэг Ковид” бодлогыг цаашид үргэлжлүүлэх болно гэдгийг мэдэгдлээ.

Иргэдийнх нь бухимдлыг төрүүлж, эдийн засагт нь хүндээр нөлөөлж байгаа энэ бодлогыг тэрээр ард иргэдийнхээ амь насыг хамгаалах зорилготой хэмээж байгаа юм.

Ши Жиньпин Хятадын онцлогтой социализмын шинэ эрин үеийг эхлүүлж, өнгөрсөн 10 жилийн хугацаанд Хятадын ДНБ 54 их наядаас 114 их наяд юань болж өссөн гэдгийг онцоллоо.

Энэ оны төлөвлөгөөгөөр Хятадын эдийн засгийн өсөлтийг 5 орчим хувьтай байна гэж тооцоолж байсан. Гэвч энэ зорилгодоо хүрч чадаагүй 4,4-4,6 хувьтай байгааг Азийн хөгжлийн банкны судалгаа харуулж байна.

Гурван жил орчим үргэлжилж байгаа хөл хорионы чанга дэглэмээс болж тус улсын инфляци 1998 оноос хойш байгаагүй өндөр хэмжээнд буюу 2,5 хувьд хүрээд байгаа юм.

Хятадын дарга Ши Жиньпин 20 дугаар их хурлын нээлтийн ёслолд хэлсэн үгэндээ ард түмнийхээ амьжиргааны түвшинг сайжруулж, боломжийг тэгш хуваарилж, ажлын байрыг нэмэгдүүлэхээ амаллаа.

Тайванийн асуудлыг хөндөхдөө Хятадын газар нутгийн бүрэн бүтэн байдалд заналхийлж Тайванийн тусгаар тогтнолыг дэмжигч салан тусгаарлах үзэлтнүүд, гадны хүчнүүдийн эсрэг хүч хэрэглэхээс татгалзахгүй гэсэн байр сууриа илэрхийллээ. Улс орных нь дотоод байдалд хөндлөнгөөс оролцохгүй байхыг сануулж, Тайваньтай холбоотой асуудлыг Хятад улс өөрөө бие даан шийдвэрлэх ёстой гэсэн Ши Жиньпиний үгийг танхимд цугласан төлөөлөгчид алга нижигнүүлэн хүлээн авсан юм.

96 сая 710 мянга орчим гишүүнтэй тус намын таван жил тутамд зохиогддог Их хурлаар Хятадын Төв Хорооны шинэ бие бүрэлдэхүүнийг сонгоно. Үүний дараа Намын төв хорооны нэгдүгээр бүгд хурлаар Намын төв хорооны улс төрийн товчоо, Намын төв хорооны улс төрийн товчооны байнгын хороо, Намын төв хорооны сахилга батыг хянан шалгах хороо, БНХАУ-ын цэргийн  төв зөвлөл, Намын ерөнхий нарийн бичгийн даргыг сонгох юм.

10-сарын 16-22-нд намын их хурал хуралдсаны дараа 23-ны өдөр намын төв хорооны нэгдүгээр бүгд хурал хуралдана. Харин 24-ны өглөө шинэ удирдлагын багийн бүрэлдэхүүнийг зарлана.

Харин засгийн газар, парламентын тэргүүнүүд 2023 онд болох Бүх Хятадын Ардын Төлөөлөгчдийн 14 дүгээр Их хурлаар сонгогдоно.

эх сурвалж: eagle.mn