Кимиа Юсофи-гын хувьд алт авах нь түүний зорилго биш байсан.

Афганистаны гүйлтийн тамирчин Олимпийн 100 метрийн уралдаанд хамгийн сүүлд орсон ч түүний гол зорилго Талибаны эрх баригчдад эмэгтэйчүүдийн эрхийг зөрчихгүй байхыг хүсэх явдал байсан юм.

“Боловсрол. Спорт. Бидний эрх, ” гэж баасан гарагт Стад де Франц цэнгэлдэх хүрээлэнд 13.42 секундэд барианд орсныхоо дараа бахархалтайгаар өөрийн гараар бичсэн тэмдэглэлээ нийтэд харуулсан байна.

“Террористууд ирсэн газар нутгийнхаа төлөө би тэмцэж байна. Тэд гэр оронд минь дайрж орон эзэлж авсан. Тэд эх оронг минь биднээс булаасан ” хэмээн тэмцээнийхээ дараа хэлжээ.

Талибуудын эрхшээлд байгаа Афганистан бол НҮБ-ын мэдээлснээр дэлхийн эмэгтэйчүүдийн эрх хамгийн ихээр зөрчигддөг улс юм. 2021 онд засгийн эрхэнд шилжсэнээс хойш Исламын шашинт бүлэглэл охидод зориулсан дунд сургуулийг хааж, эмэгтэйчүүдийг их сургуульд сурах, ТББ-д ажиллахыг хориглож, эрэгтэй харгалзагчгүйгээр зорчихыг нь хязгаарлаж, цэцэрлэгт хүрээлэн, биеийн тамирын заал зэрэг олон нийтийн газраар явахыг нь хориглосон билээ.

Талибуудын ёс суртахууны цагдаа гэх нэртэй цагдаа нар хүртэл эмэгтэйчүүд, охидыг зүй бусаар айлган сүрдүүлдэг гэж НҮБ-аас өнгөрсөн сард нийтэлсэн тайланд дурджээ.

Юсофи нь одоогоор 28-тай ба Парис олимпод түүний улсаас 3 эрэгтэй, 3 эмэгтэй тамирчид оролцож байгаагаас гүйлтийн төрлөөр оролцож буй ганцхан эмэгтэй тамирчин.

Иранд дүрвэгсдийн эцэг эхийн гэр бүлд төрсөн Юсофи 2016 оны Риогийн олимпод эх орноо төлөөлөн Афганистанд нүүж ирсэн бөгөөд 2021 онд Токиогийн наадамд тус улсынхаа тугийг барьсан юм.

Тэрбээр Парис олимпод  бэлдэхээр 2022 онд Австралид түр хугацаагаар суурьшин Сиднэй гаралтай дасгалжуулагч Жон Куинээр бэлтгэгдсэн байна.

Эх сурвалж: CNN

Бэлтгэсэн: О. Янжинлхам