Кансай дахь судлаачдын баг шүд ургуулахад туслах эм боловсруулах эмнэлзүйн туршилтыг ирэх сард эхлүүлэх гэж байна.

Китано эмнэлэг, Киотогийн их сургуулийн эмнэлэг зэрэг эрдэмтэд төрөлхийн “anondontia” өвчтэй, цөөн шүдтэй төрдөг хүмүүсийг эмчлэхэд чиглэсэн шүд засах эмийн туршилт хийх болно.

Аюулгүй эсэхийг нь шалгахын тулд туршилтын эмийг төрөлхийн “anondontia”-той хүүхдүүдэд туршихын өмнө араандаа шүдгүй болсон насанд хүрсэн эрэгтэй хүмүүс дээр туршина. Тус багийнхан уг эмчилгээг 2030 он гэхэд бодит хэрэглээнд нэвтрүүлэхээр зорьж байна.

100 хүн тутмын нэг нь төрөлхийн “anondontia” өвчнөөр өвчилдөг гэж үздэг бол 1000 хүн тутмын нэг нь удамшлын өвчний улмаас зургаа ба түүнээс дээш шүдгүй болдог. Өвчин эмгэгийг эмчлэх үндсэн эмчилгээ байдаггүй бөгөөд өвчтэй хүүхдүүд өсч томрох үедээ шинэ хиймэл шүд хийлгэх шаардлагатай болдог.

Шүдний ургалтыг хязгаарладаг “USAG-1” гэгддэг уургийг олж илрүүлсний дараагаар судалгааны баг уургийн үйл ажиллагааг саармагжуулдаг эм бүтээжээ. Төрөлхийн “anondontia” өвчтэй хулгана, нохойд эмийг хэрэглэх үед шүд нь ургасан гайхалтай үйл явдал болжээ.

Эмнэлзүйн туршилтууд ирэх оны наймдугаар сар хүртэл үргэлжилнэ. Эхний шатанд Киотогийн их сургуулийн эмнэлэгт 30-64 насны эрүүл 30 эрэгтэйд судсаар тарьж, эмчилгээний аюулгүй байдал, тохирох тунг судална. Хоёр дахь шатанд 4-өөс доошгүй шүдтэй 2-7 насны өвчтөнүүдийг хамруулна.

Цаашид шүд нь цоорсон болон бусад асуудлын улмаас бүрмөсөн шүдээ алдсан хүмүүст эмчилгээг хийхээр төлөвлөж байгаа юм байна.

Осака хотын Китано эмнэлгийн шүд, амны хөндийн мэс заслын тасгийн эрхлэгч Кацу Такахаши “Бид шүдгүйн улмаас амьдрахад хүндрэлтэй байгаа хүмүүст туслахыг хүсч байна” гэж мэдэгджээ.

Эх сурвалж: Japan Times

Бэлтгэсэн: О. Янжинлхам