Энэ сарын сүүлчээр манай Дэлхий хоёр дагуултай болно. Тодруулбал, 11 орчим метрийн голчтой 2024РТ солир есдүгээр сарын 29-нд манай гаргийн тойрог замд нэвтрэн орж, өвөрмөц бичил Сар болж хувирах бөгөөд 56.6 хоногийн турш дэлхийг тойрон эргэлдэх ажээ. 

Уг солирыг “Asteroid Terrestrial-impact Last Alert” системийн дуран авайгаар судалгаа хийж буй эрдэмтэд ӨАБНУ-д суурилуулсан огторгуйн дуран авайг ашиглан илрүүлжээ.

Мадрид хот дахь Комплутенсегийн их сургуулийн эрдэмтэд солирын нислэгийн чиглэлийг гурван долоо хоногийн турш ажигласан байна. 2024 PT5 нь Нарыг тойрон эргэлдэж буй Аржуна солирын бүсэд байгааг ажиглалтын явцад олж тогтоожээ. Дэлхийн татах хүчний нөлөөгөөр тухайн солир хэдэн долоо хоногийн турш дэлхийг тойрон эргэлдсэнийхээ дараа арваннэгдүгээр сарын 25-нд гелиоцентрик тойрог замд буцан орж Нарыг тойрон эргэлдэх аж.

2024 PT5 нь жижиг хэмжээтэй тул дуран эсвэл сонирхогчдын дуран авайгаар Дэлхийгээс ажиглах боломжгүй гэдгийг эрдэмтэд хэлж байна. Харин илүү хүчирхэг багаж хэрэгсэлтэй мэргэжлийн одон орончид сансрын биетийн хөдөлгөөнийг ажиглах боломжтой. Манай гаргийн тойрог замаас гарсныхаа дараа ч гэсэн уг биет хэдэн сарын турш Дэлхийн ойролцоо байх бөгөөд 2025 оны нэгдүгээр сарын 9-нд хамгийн ихээр ойртсоныхоо дараа дахиад холдож эхэлнэ. Дараагийн удаад дэлхийн тойрог замд 30 орчим жилийн дараа орох гэнэ.