Их Британи улс нүүрсээр ажилладаг сүүлчийн цахилгаан станцаа хаажээ. Ийнхүү цахилгаан эрчим хүчний үйлдвэрлэлд уг олборлодог түлшийг ашиглахаа больсон “Долоогийн бүлэг”-ийн анхны орон болж байгаа юм.

60 орчим жилийн турш Английн төв нутгийн цахилгаан эрчим хүчний үйлдвэрлэлд давамгайлсаар ирсэн “Ratcliffe-on-Soar” цахилгаан станцыг хааж буй нь 2030 он гэхэд цахилгаан эрчим хүчний үйлдвэрлэлээс ялгарах нүүрстөрөгчийн хийн ялгарлыг тэглэх, улмаар 2050 он гэхэд нүүрстөрөгчийн ялгарал, шингээлтийн зөрүүг тэглэх Их Британийн зорилгын хувьд бэлгэдлийн шинжтэй алхам болж байна.

Их Британий Эрчим хүчний сайд Майкл Шанкс энэ талаар “Манай улсын хувьд нүүрсний эрин үе дуусаж, цэвэр эрчим хүчний салбарын шинэ эрин эхэлж байна” гэж мэдэгджээ. “Ratcliffe-on-Soar” станцыг эзэмшдэг “Uniper” компанийн мэдэгдсэнээр, уг станцыг ирэх аравдугаар сараас эхлэн хоёр жилийн хугацаанд татан буулгах бөгөөд оронд нь “нүүрстөрөгч ялгаруулдаггүй технологи, эрчим хүчний төв”-ийг байгуулах юм байна.

Ингэснээр Их Британи улс 140 жилийн турш үргэлжилсэн нүүрснээс хараат байдлаа дуусгавар болгож байгаа бөгөөд “Долоогийн бүлэг”-ийн чинээлэг улсуудын дундаас нүүрсийг ашиглан цахилгаан үйлдвэрлэхээс татгалзсан анхны улс болж байна. Энэхүү зорилгод Итали улс ирэх онд, Франц 2027 онд, Канад 2030 онд, Герман 2038 онд тус тус хүрэхээр төлөвлөж байна. Харин Япон, АНУ тодорхой тов танилцуулаагүй байна.

эх сурвалж: The economist