БРИКС бүлгийг “Долоогийн бүлэг”-ийн өөр нэгэн хувилбар гэж нэрлэгддэг БРИКС-ын дээд хэмжээний чуулга уулзалт энэ сарын 22-24-ний өдрүүдэд ОХУ-д болж байгаа билээ. Тус чуулга уулзалтад оролцохоор ирсэн БНХАУ-ын дарга Ши Жиньпин  Кремльд ОХУ-ын ерөнхийлөгч Владимир Путинтай уулзжээ.

Энэ үеэр БНХАУ-ын дарг аШи Жиньпин, "ОХУ-ын  Ерөнхийлөгч Путины урилгаар БРИКС-ийн XVI дээд хэмжээний уулзалтад оролцохоор Оросын эртний хот Казань хотод хүрэлцэн ирсэндээ баяртай байна. Энэ жил бид гурав дахь удаагаа уулзаж байна. Ойролцоогоор 400 жилийн өмнө манай хоёр орныг холбосон Их Цайны зам Казань хотыг дайран өнгөрч, Хятадын Вуй уулын бүс нутгийн цайны навч Оросын олон айл өрхөд нэвтэрч байжээ. Энэ сарын эхээр бид Хятад-Оросын дипломат харилцаа тогтоосны 75 жилийн ойг тохиолдуулан харилцан баярын цахилгаан илгээсэн. Мөн бид  “эвсэлд үл нэгдэх, сөргөлдөөнгүй, гуравдагч талд чиглэхгүй байх" хөрш орнуудын эвтэй харилцах арга замыг хайн судалж ирлээ.  Шинэ эринд та бид хоёр Хятад, Оросын харилцааны чиг хандлагыг үргэлж анхаарч, тууштай чиглүүлж ирсэн. Хоёр тал урт удаан хугацааны сайн хөрш, найрамдал, иж бүрэн стратегийн зохицуулалт, харилцан ашигтай хамтын ажиллагааны үзэл санааны дагуу ажиллаж, стратегийн иж бүрэн зохицуулалт, бүх талын бодит хамтын ажиллагаагаа гүнзгийрүүлэн өргөжүүлсээр байна. Энэ нь манай хоёр орны хөгжил, сэргэн мандалт, шинэчлэлд хүчтэй түлхэц өгч, Хятад, Оросын ард түмний сайн сайхан байдлыг дээшлүүлэх, олон улсын шударга ёсыг хамгаалахад чухал хувь нэмэр оруулсан.

БРИКС-ийн хамтын ажиллагааны механизм нь өнөөгийн дэлхийн хөгжиж буй орнуудын эв санааны нэгдэл, хамтын ажиллагааны хамгийн чухал платформ юм. Энэ нь эрх тэгш, эмх цэгцтэй олон туйлт ертөнц, нийтийг хамарсан ашигтай, хүртээмжтэй эдийн засгийн даяаршлыг хэрэгжүүлэх тулгуур багана билээ. Маргааш болох БРИКС-ийн дээд хэмжээний уулзалт нь өнгөрсөн жилийн өргөтгөлийн дараах анхны дээд хэмжээний уулзалт болох бөгөөд БРИКС-ийн хамтын ажиллагааг өргөжүүлэхэд чухал ач холбогдолтой. БРИКС-ийн даргаар ажиллаж буй Оросын хүчин чармайлтыг Хятад улс өндрөөр үнэлж байна. Би Ерөнхийлөгч Путин болон бусад оролцогч удирдагчидтай БРИКС-ийн механизмыг цаашид хөгжүүлэх талаар гүнзгий ярилцаж, талууд зөвшилцөлд хүрч, эв санааны нэгдэл, хамтын ажиллагааны эерэг мессежийг илгээж, БРИКС-ийн орнуудын стратегийн зохицуулалт, бодит хамтын ажиллагааг бүхий л салбарт урагшлуулахыг тэсэн ядан хүлээж байна. Ингэснээр бид дэлхийн өмнөд хэсэгт илүү их боломжийг олгож, хүн төрөлхтний хамтын ирээдүйтэй хамтын нийгэмлэгийг байгуулахад илүү их хувь нэмэр оруулж чадна" гэжээ.

Харин ОХУ-ын Ерөнхийлөгч В.Путин, "Эрхэм хүндэт ноён дарга, эрхэм найз нөхдүүдийг ОХУ-ын Казань хотод тавтай морилохыг чиг сэтгэлээсээ хүсэж байна. Өнгөрсөн 75 жилийн хугацаанд, Орос, Хятад хоёр орон шинэ эрин үеийн иж бүрэн стратегийн хамтын ажиллагааны түнш болж хөгжсөн. Хоёр орны харилцаа өндөр түвшний хөгжлөө хадгалж, шинэ хэлбэрийн томоохон гүрнүүдийн харилцааны үлгэр жишээг бий болгосоор байна. БРИКС-ийн хүрээн дэх Орос, Хятадын урт хугацааны өндөр түвшний хамтын ажиллагааг өндрөөр үнэлж байна. Дээд хэмжээний уулзалт болохоос өмнө тантай хоёр талын харилцаа, олон улсын асуудлаар санал бодлоо солилцох боломж олдсондоо баяртай байна" гэжээ.