2024 онд Японд нэг өрхийн худалдан авсан цагаан будааны хэмжээ өмнөх оноос 6.3 хувиар өссөнийг Японы засгийн газар мэдээлсэн. Үүний шалтгаан нь иргэд гол хүнсний бүтээгдэхүүний хомсдолоос болгоомжлон будааг ихээр худалдан авч байна гэж шинжээчид үзэж байна.

Хоёр ба түүнээс дээш хүн амтай өрхийн худалдан авсан цагаан будааны хэмжээ өссөн нь COVID-19 тахлын үед хүнсний эрэлт хэрэгцээ нэмэгдсэн 2020 оноос хойших анхны өсөлт юм.

Дотоод хэрэг, харилцаа холбооны яамны хэрэглэгчдийн зарцуулалтын мэдээлэлд хийсэн дүн шинжилгээгээр өнгөрсөн онд нэг өрхөд худалдан авсан будааны хэмжээ 60.20 кг болж, 2023 оныхоос 3.55 кг-аар өссөн байна.

Тус яамнаас гаргасан эдийн засгийн хамгийн сүүлийн үзүүлэлтээр Японд цагаан будааны үнэ өндөр хэвээр байгаа бөгөөд 1971 онтой харьцуулахад энэ оны хоёрдугаар сарын будааны үнэ 80.9 хувиар огцом өссөн хэмээн мэдээлжээ.

2024 онд долдугаар сар хүртэлх хэмжээ өмнөх оныхоос бараг ялгаагүй байсан боловч наймдугаар сард нийлүүлэлт улам чангарахтай холбоотой таамаглалаас болж үнэ 29 хувиар өссөн ба зарим талаараа мега газар хөдлөлтийн талаар засгийн газраас өгсөн зөвлөмжтэй холбоотой юм.

Цагаан будааны үнэ тэнгэрт хадахаас сэргийлэхийн тулд Засгийн газар хоёрдугаар сард нөөцөөсөө 210,000 тонныг гаргахаар шийдвэрлэсэн ба нийлүүлэлтийг тогтворжуулахад чиглэсэн энэхүү алхам нь зах зээлийг хэвийн байдалд оруулна гэж үзжээ.

Эх сурвалж: Japan Today

Бэлтгэсэн: Сарасвати