2013 онд үзэгчдийн хүртээл болсон Итгэл ( Hope) хэмээх Солонгосын сэтгэл эмзэглүүлэх киног үзээгүй хүн ховор л болов уу.

Тэгвэл тэрхүү кино бодит явдлаас сэдэвлэсэн бөгөөд тухайн хэргийг үйлдсэн Чу Ду Сүн гэх этгээд 2020.12.12-ны өдөр шоронгоос суллагджээ. Өдгөө 68 настай Чу Ду Сүн нь шүүхээс оноосон 12 жилийн ялаа бүрэн эдлээд суллагдсан байна. Түүнийг суллах үеэр Солонгосын иргэд эсэргүүцэн хэрэгтнийг суллагдах эрхгүй хэмээж, түүний явах замыг хаажээ. Улмаар түүнийг цагдаагийн хамгаалалт дор Ансан дахь эхнэрийнх нь гэрт хүргэж өгчээ. Хэрэгтнийг хамгаалалтын машинаар гэрт нь хүргэж өгсөн энэхүү үйлдлээ тус улсын хууль зүйн яам "Тэрээр харих замдаа бэртэх эрсдэл маш өндөр, иргэдээс биеийн болон сэтгэл санааны хүчирхийлэл, дарамтад өртөхөөс нь урьдчилан сэргийлж бид хувийн унаагаар хүргэж ѳгсѳн" хэмээн тайлбарлажээ.

Ийнхүү хэрэгтэн өөрийн хуучин амьдарч байсан гэртээ харих болсон учраас хохирогч охины гэр бүл яаралтай нүүхээр болсон байна.

Хэргийн талаар тодруулбал, 2008 онд Солонгосын Кёнги аймгийн Ансан хотын нэгэн сүмийн 00-д 8 настай охиныг балмад хэрцгийгээр хүчирхийлсэн онц ноцтой гэмт хэрэг гарсан юм. Хэрэгтэн охиныг хүчирхийлээд зогсохгүй түүний дотор эрхтнүүдийг нь хүндээр гэмтээж улмаар охины дотор эрхтнүүд нь цуварч гарсан байсныг нь шалны модоор буцаан чихээд хэргийн газраас зугтсан байсан. Азаар хүмүүс охиныг цаг алдалгүй олж анхны тусламж үзүүлж чадсан ч тэрээр ялгаруулах эрхтнүүдийнхээ 80 хувийг алдаж, насан туршдаа гуурстай амьдрахад хүрсэн юм.

Тухайн үед цагдаа нар шуурхай ажиллаж хэргийг Чу Ду Сүн хэмээх эр үйлдсэн болохыг тогтоосон. Чу Ду Сүн нь хэрэг үйлдэх үедээ 56 настай байсан бөгөөд цагдаа нарт мэдүүлэхдээ согтуу байсан учраас юу ч санахгүй байна хэмээн мэдүүлсэн. Улмаар шүүхээс түүнийг өндөр настай мөн хэрэг үйлдэх үедээ согтууруулах ундаа хэрэглэсэн байсан хэмээн үзэж 12 жилийн хорих ял оноожээ. Шүүхийн шийдвэр гарсны дараа Солонгосын иргэд түүнд хэтэрхий зөөлөн ял өглөө хэмээн үзэж эсэргүүцэж байсан юм. Хэдийгээр тэдний тэмцэл Чу Ду Сүнийг үргэлжлүүлэн шоронд хориулж чадаагүй ч хүчирхийллийн тухай хуульд өөрчлөлт хийхэд нөлөөлсөн байна.

Энэ нь хэрэгтэн насанд хүрээгүй хүүхдийн эсрэг гэмт хэрэг, бэлгийн хүчирхийлэл үйлдсэн бол түүний согтууруулах ундаа болон сэтгэцэд нөлөөлөх эм тариа хэрэглэсэн эсэхээс үл хамааран оноосон ялыг хүндрүүлэх тусгай заалт юм.

Мөн тус улсын Засгийн газар 2019 оны дөрөвдүгээр сарын 16-наас эхлэн насан хүрээгүй хүүхдийн эсрэг бэлгийн хүчирхийлэл үйлдсэн хэрэгтнүүдэд зориулсан "Чу Дү Сүн хууль"-ийг хэрэгжүүлж эхэлсэн юм. Ингэснээр хэрэгтэн хэдийгээр ялаа эдэлж гарсан ч 7 жилийн турш хөлөндөө цахилгаан бугуйвчтай явах бөгөөд хэрэгтний нэр, зураг, гэрийн хаяг гэх мэт мэдээллүүд 5 жилийн турш гэмт хэрэгтний царайг дэлгэдэг сайтад байрших юм байна. Мөн түүнийг гэрээсээ орж гарах бүрт мэдээлэл дамжуулдаг хяналтын тѳхѳѳрѳмжийг гэрт нь суурилуулахаас гадна Ансан хотод шинээр 247 камер суурилуулж, дахин нэмж 20 камер суулгахаар тѳлѳвлѳжээ. Ингэснээр дахин гэмт хэрэг үйлдэх боломжгүй болох бөгөөд олон нийт ч тэдний мэдээлэлтэй танилцаж урьдчилан сэргийлэх бүрэн боломжтой болох аж.