ОХУ-ын Ерөнхийлөгч Владимир Путин нэгэн сонирхолтой хуулийн заалтад гарын үсэг зурж  баталгаажуулжээ.

Тодруулбал,  ОХУ-ын Ерөнхийлөгчөөр сонгогдон ажиллаж байсан хүн албан тушаалаа өгсний дараа халдашгүй дархан эрхтэй болох хууль юм. Энэ хуулинд зөвхөн экс Ерөнхийлөгчдөөс гадна тэдний гэр бүл тэр бүү хэл тэдний  орон сууц, ажлын байр, тээврийн хэрэгсэл, харилцаа холбооны хэрэгсэл, ачаа тээш, бичиг баримт зэрэг хамаарах аж. Улмаар тус хуульд хамаарах хүмүүсийг эрүүгийн болон захиргааны хариуцлага тооцох, саатуулах, баривчлах, байцаах, эрэн сурвалжлах, шалгах боломжгүй болж байгаа юм.

Харин экс Ерөнхийлөгч болон түүний хамаарал бүхий этгээдүүд эх орноосоо урвасан, хүнд гэмт хэрэг үйлдсэн гэсэн хоёр тохиолдолд түүний халдашгүй байдлын эрхийг Төрийн Думын гарган өгсөн үндэслэл дээр тулгуурлан Холбооны зөвлөл халах боломжтой болох юм байна. Ингэхдээ Холбооны зөвлөлийн гишүүдийн гуравны хоёр нь дэмжсэн байх ёстой бөгөөд хамгийн гол нь тухайн этгээдийн халдашгүй байдлыг халах үндэслэлийг тавьснаас хойш гурван сарын дотор хэлэлцэж шийдэхгүй бол үндэслэлийг хэрэгсэхгүй болгоно гэж заасан аж.