Зэвсэгт хүчний Жанжин штабын дарга, дэслэгч генерал Сүнрэвийн Ганбямба ОХУ-д айлчилж байна. Тэрээр ОХУ-ын Зэвсэгт хүчний Жанжин штабын дарга, Батлан хамгаалахын сайдын нэгдүгээр орлогч, армийн генерал Валерий Герасимовтой хэлэлцээр хийв.

ОХУ-ын Жанжин штабын дарга, армийн генерал Валерий Герасимов хэлсэн үгэндээ “Бид Монгол Улсыг ОХУ-ын маш чухал түншийн нэг гэж үздэг. Бидний харилцаа, хамтын ажиллагаа  уламжлал ёсоор нөхөрлөл, итгэлцэл, сайн хөршийн зарчимд тулгуурлан хөгжиж ирсэн. 

Цэргийн төлөөлөгчдийн харилцан айлчлал идэвхтэй өргөжиж байна. Шуурхай болон байлдааны бэлтгэлийн хамтарсан арга хэмжээнүүдийг тогтмол зохион байгуулж байна. Мөн цэргийн боловсролын байгууллагуудын хооронд, хилийн бүсийн цэргийн тойргуудын шугамаар хамтын ажиллагааг тогтоолоо” хэмээн онцлов.

Хариуд нь Монгол Улсын Зэвсэгт хүчний Жанжин штабын дарга, дэслэгч генерал Сүнрэвийн Ганбямба  Орос, Монголын харилцаа өнөөдөр хамгийн өндөр түвшинд хүрснийг онцлон тэмдэглээд “Манай хоёр улсын төрийн тэргүүн нар найрсаг харилцаа, иж бүрэн стратегийн түншлэлийн тухай гэрээнд гарын үсэг зурсан. Үүнтэй холбоотойгоор манай харилцаа бүхий л салбарт, тэр дундаа батлан хамгаалах салбарт идэвхтэй хөгжиж байна” гэсэн байна.

Эх сурвалж: Монгол улс дахь ОХУ-ын ЭСЯ