Энэ оны тавдугаар сард Дорноговь аймгийн Хөвсгөл сум, есдүгээр сард Говь-Алтай аймгийн Цогт, Дэлгэр сум, Төв аймгийн Албанбулаг суманд ямааны годрон өвчин батлагдсантай холбогдуулан Улсын Онцгой комиссоос нийт 58 малын 26840 толгой ямааг зориудаар устган, устгалын цэгт булшилж, халдваргүйтгэлийн арга хэмжээг хэрэгжүүлэн ажиллалаа.

Мал, амьтны эрүүл мэндийн тухай хуулийн 33.1.2.4-т “зайлшгүй шаардлагаар төхөөрсөн малын тухайн орон нутаг дахь жишиг үнийн 40 хувь, гоц халдварт өвчний улмаас зайлшгүй шаардлагаар устгасан мал, тэжээвэр амьтны тухайн орон нутаг дахь жишиг үнийн 90 хувьтай тэнцэх нөхөн төлбөр” гэж, Засгийн газрын 2018 оны 266 дугаар тогтоолын 2 дугаар хавсралтаар баталсан “Хорио цээр, хязгаарлалтын дэглэмийн үед хэрэгжүүлэх үйл ажиллагааны журам”-ын 9.3-т “Зориудаар устгасан малын нөхөн төлбөрийг тооцохдоо хорио цээр, хязгаарлалтын дэглэм тогтоохын өмнөх сард тухайн аймгийн статистикийн газраас гаргасан малын үнийн судалгаанд үндэслэнэ” гэж заасны дагуу нөхөн олговрыг тооцлоо.

Ийнхүү Засгийн газрын хуралдаанаар (2026.10.28) зориудын устгалд Говь-Алтай аймгийн Цогт сумын 47 өрхийн 23,358, Дэлгэр сумын 5 өрхийн 1,999, Төв аймгийн Алтанбулаг сумын 2 өрхийн 751, Дорноговь аймгийн Хөвсгөл сумын 4 өрхийн 732, нийт 58 малчин өрхийн 26,840 толгой ямааг хамруулсан нөхөн төлбөрт нийт 5.3 тэрбум төгрөгийг шийдвэрлэлээ.